ਪਹਿਲਗਾਮ ਹਮਲੇ ਦੇ ਪੀੜਤ ਪਰਿਵਾਰਾਂ ਵੱਲੋਂ ਭਾਰਤ-ਪਾਕਿਸਤਾਨ ਮੈਚ ਦਾ ਵਿਰੋਧ, ਸਰਕਾਰ ਤੋਂ ਕੀਤੇ ਸਖ਼ਤ ਸਵਾਲ

ਏਸ਼ੀਆ ਕੱਪ ਵਿੱਚ ਭਾਰਤ-ਪਾਕਿਸਤਾਨ ਕ੍ਰਿਕਟ ਮੈਚ ਨੂੰ ਲੈ ਕੇ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਹਮਲੇ ਦੇ ਪੀੜਤ ਪਰਿਵਾਰਾਂ ਨੇ ਆਪਣਾ ਗੁੱਸਾ ਜਾਹਿਰ ਕੀਤਾ ਹੈ। ਪਰਿਵਾਰਾਂ ਦਾ ਕਹਿਣਾ ਹੈ ਕਿ ਜਦੋਂ ਪਾਕਿਸਤਾਨ ਦੀ ਪਿੱਠਬੰਦੀ ਨਾਲ ਅੱਤਵਾਦੀਆਂ ਨੇ ਦਰਜਨਾਂ ਬੇਗੁਨਾਹ ਸੈਲਾਨੀਆਂ ਨੂੰ ਮਾਰ ਦਿੱਤਾ ਸੀ, ਤਾਂ ਫਿਰ ਅਜਿਹੇ ਦੇਸ਼ ਨਾਲ ਖੇਡ ਸਮੇਤ ਕਿਸੇ ਵੀ ਤਰ੍ਹਾਂ ਦਾ ਸਬੰਧ ਰੱਖਣਾ ਨਿਆਂ ਨਹੀਂ।

ਸਾਵਨ ਪਰਮਾਰ, ਜਿਸ ਨੇ ਇਸ ਹਮਲੇ ਵਿੱਚ ਆਪਣੇ ਪਿਤਾ ਅਤੇ 16 ਸਾਲਾ ਭਰਾ ਨੂੰ ਖੋ ਦਿੱਤਾ, ਨੇ ਕਿਹਾ ਕਿ ਜਦੋਂ ਤੋਂ ਭਾਰਤ-ਪਾਕਿਸਤਾਨ ਮੈਚ ਦੀਆਂ ਖ਼ਬਰਾਂ ਆ ਰਹੀਆਂ ਹਨ, ਪਰਿਵਾਰਾਂ ਵਿੱਚ ਨਿਰਾਸ਼ਾ ਵੱਧ ਗਈ ਹੈ। ਉਸ ਨੇ ਕਹਿਆ—“ਜੇ ਮੈਚ ਕਰਨਾ ਹੀ ਹੈ ਤਾਂ ਪਹਿਲਾਂ ਮੇਰੇ ਭਰਾ ਨੂੰ ਵਾਪਸ ਲਿਆ ਕੇ ਦਿਖਾਓ। ਆਪ੍ਰੇਸ਼ਨ ਸਿੰਦੂਰ ਅਧੂਰਾ ਮਹਿਸੂਸ ਹੁੰਦਾ ਹੈ।”

ਯਾਦ ਰਹੇ ਕਿ 22 ਅਪ੍ਰੈਲ ਨੂੰ ਪਹਿਲਗਾਮ ਵਿੱਚ ਅੱਤਵਾਦੀਆਂ ਨੇ ਸੈਲਾਨੀਆਂ ਦੀ ਧਰਮ ਅਨੁਸਾਰ ਪਛਾਣ ਕਰਕੇ ਹਮਲਾ ਕੀਤਾ ਸੀ। ਇਸ ਘਟਨਾ ਵਿੱਚ 25 ਭਾਰਤੀ ਅਤੇ ਇੱਕ ਨੇਪਾਲੀ ਸੈਲਾਨੀ ਮਾਰੇ ਗਏ ਸਨ। ਹਮਲਾਵਰਾਂ ਨੇ ਪੀੜਤਾਂ ਨੂੰ ਕਹਿਆ ਸੀ—“ਜਾ ਕੇ ਮੋਦੀ ਕੋ ਬੋਲਾ ਦੇਣਾ।” ਇਹ ਗੱਲ ਸਾਬਤ ਕਰਦੀ ਹੈ ਕਿ ਇਹ ਹਮਲਾ ਪੂਰੀ ਤਰ੍ਹਾਂ ਨਿਸ਼ਾਨਾਬੰਦੀ ਕਰਕੇ ਕੀਤਾ ਗਿਆ ਸੀ।

ਸਾਵਨ ਦੀ ਮਾਂ, ਕਿਰਨ ਯਤੀਸ਼ ਪਰਮਾਰ, ਨੇ ਵੀ ਕੇਂਦਰ ਸਰਕਾਰ ’ਤੇ ਸਵਾਲ ਚੁੱਕੇ ਹਨ। ਉਹ ਕਹਿੰਦੀ ਹੈ ਕਿ ਜਦੋਂ ਸਾਡੇ ਜ਼ਖ਼ਮ ਅਜੇ ਭਰੇ ਨਹੀਂ, ਫਿਰ ਭਾਰਤ-ਪਾਕਿਸਤਾਨ ਮੈਚ ਖੇਡਣ ਦਾ ਕੀ ਮਤਲਬ ਹੈ? ਜੇ ਆਪ੍ਰੇਸ਼ਨ ਸਿੰਦੂਰ ਅਧੂਰਾ ਹੈ ਤਾਂ ਅਜਿਹਾ ਕਦਮ ਕਿਉਂ ਚੁੱਕਿਆ ਜਾ ਰਿਹਾ ਹੈ? ਉਹਨਾਂ ਨੇ ਅਪੀਲ ਕੀਤੀ ਕਿ ਦੇਸ਼ ਦੇ ਲੋਕ ਪਹਿਲਗਾਮ ਹਮਲੇ ਦੇ ਪੀੜਤ ਪਰਿਵਾਰਾਂ ਦੇ ਦਰਦ ਨੂੰ ਸਮਝਣ ਲਈ ਅੱਗੇ ਆਉਣ।